ಆರೋಗ್ಯಕ್ಕಾಗಿ ಏಕಸೂತ್ರ- ವ್ಯಾಯಾಮ!

 ಇಡೀ ಶರೀರಕ್ಕೆ ಶ್ರಮವೆನಿಸುವ ಎಲ್ಲ ಕ್ರಿಯೆಗಳೂ ವ್ಯಾಯಾಮವೇ !

ವ್ಯಾಯಾಮದಿಂದ ಉತ್ತಮ ಆರೋಗ್ಯ !

ವ್ಯಾಯಾಮದಿಂದ ದೈಹಿಕ ಸೌಂದರ್ಯ !

• ಮುಪ್ಪು ಒಮ್ಮೆಲೇ ಬಾರದು, ಮಾಂಸಗಳಲ್ಲಿ ಸ್ಥಿರತೆ ಕಂಡುಬರುವುದು.
• ನೋಡಲು ಚಂದವಿಲ್ಲದ, ಒಳ್ಳೆಯ ಗುಣವಿಲ್ಲದ ವ್ಯಕ್ತಿಯನ್ನೂ ಸಹ ವ್ಯಾಯಾಮ ಆಕರ್ಷಕನನ್ನಾಗಿಸುವುದು.
• ಪ್ರಕೃತಿಗೆ ವಿರುದ್ಧವಾದ ಆಹಾರ ಸೇವನೆ, ಅತಿ ಬೆಂದ, ಬೇಯದ ಆಹಾರ ಪದಾರ್ಥಗಳನ್ನೂ ಸಹ ವ್ಯಾಯಾಮ ಸುಖವಾಗಿ ಪಚನ ಮಾಡಿಸುವುದು. ರಾತ್ರಿಯ ಆಹಾರ ಅಜೀರ್ಣವಾದಾಗ ಕೆಲವರಿಗೆ ಬೆಳಗ್ಗೆ ರೋಗ ಕಂಡುಬರುವುದು. ಬೆಳಗಿನ ಆಹಾರ ಅಜೀರ್ಣವಾದಾಗ ಯಾವುದೇ ತೊಂದರೆ ಕೆಲವು ಸಲ ಕಾಣದು! ಕಾರಣ ಹಗಲಿನ ಕ್ರಿಯಶೀಲವಾದ ಜೀವನ !!

ಯಾವಾಗ ಯಾರಿಗೆ ಎಷ್ಟು  ವ್ಯಾಯಾಮ ?

• ದೇಹಬಲ ಚೆನ್ನಾಗಿರುವವರಿಗೆ, ಚೆನ್ನಾಗಿ ಜಿಡ್ಡುಳ್ಳ ಆಹಾರ ಸೇವಿಸುವವರಿಗೆ ವ್ಯಾಯಾಮ ! ಅತಿ ಕೃಶರೂ, ದುರ್ಬಲರೂ, ಒಣ ಆಹಾರ ಸೇವಿಸುವವರೂ ವ್ಯಾಯಾಮ ಮಾಡಿದರೆ ಧಾತುಕ್ಷಯವಾಗುವ ಸಾಧ್ಯತೆ ಹೆಚ್ಚು.
• ಚಳಿಗಾಲ ಮತ್ತು ವಸಂತ ಋತುವಿನಲ್ಲಿ ವ್ಯಾಯಾಮ ಅತ್ಯಂತ ಸೂಕ್ತ ! ಉಳಿದೆಲ್ಲ ಋತುವಿನಲ್ಲೂ ದೇಹದ ಅರ್ಧ ಶಕ್ತಿ ಖರ್ಚಾಗುವಷ್ಟು ಮಾತ್ರ ವ್ಯಾಯಾಮ ಹಿತಕರ.
• ಬಾಯಲ್ಲಿ ಉಸಿರಾಡುವಂತೆ  ( ಶ್ರಮಶ್ವಾಸ ) ದೇಹದ ಅರ್ಧ ಶಕ್ತಿ ಖರ್ಚಾದ ಲಕ್ಷಣ.

ವ್ಯಾಯಾಮ ವಿಷಯದಲ್ಲಿ ಎಚ್ಚರಿಕೆ !

• ಮಕ್ಕಳಿಗೆ, ವೃದ್ಧರಿಗೆ ವ್ಯಾಯಾಮ ಅನವಶ್ಯಕ, ಗರ್ಭಿಣಿ ಅತಿ ವ್ಯಾಯಾಮ ಮಾಡಬಾರದು.
• ಕ್ಷೀಣರು, ನಿದ್ದೆಗೆಟ್ಟವರು ಈಗಾಗಲೇ ಆಯಾಸವಿರುವವರು ವ್ಯಾಯಾಮ ಮಾಡಬಾರದು.
• ಮರಳುಗಾಡಿನಲ್ಲೂ , ತೀವ್ರ ಸೆಕೆಯಿರುವ ಬಿಸಿಲಿನಲ್ಲೂ , ಊಟವಾದ ಮೇಲೂ ವ್ಯಾಯಾಮ ನಿಷಿದ್ಧ.
• ಹೀಗೆ ವಯಸ್ಸು, ಬಲ, ಪ್ರಕೃತಿ, ಇರುವ ಪ್ರದೇಶ, ಕಾಲಗಳನ್ನು ಗಮನಿಸಿ ಸೂಕ್ತವಾಗಿ ವ್ಯಾಯಾಮ ಮಾಡಬೇಕು. ಇಲ್ಲದಿದ್ದರೆ ವ್ಯಾಯಾಮದಿಂದಲೇ ರೋಗವೂ ಬರಬಹುದು!
• ರಾಜಯಕ್ಷಾ, ಬಾಯಾರಿಕೆ, ಅರುಚಿ, ವಾಂತಿ, ದೋಷಜನ್ಯ ವ್ಯಾಧಿಗಳು, ತಲೆ ತಿರುಗುವಿಕೆ, ಕೆಮ್ಮು, ಮೈ ಒಣಗುವುದು, ಉಬ್ಬಸ , ಜ್ವರ ಈ ಎಲ್ಲಾ ಖಾಯಿಲೆಗಳೂ ಹೆಚ್ಚಾದ ವ್ಯಾಯಾಮದಿಂದ ಬರಬಹುದು!!
• ಬಾಯಿ, ಮೂಗು, ಗುದದಿಂದ ರಕ್ತಸ್ರಾವವಾಗುತ್ತಿರುವುದು, ಅತಿ ಕೃಶರು, ಒಣಗಿದ ಶರೀರವುಳ್ಳವರು, ಉಬ್ಬಸ, ಕೆಮ್ಮು, ಅಪಘಾತವಾದವರು, ತಲೆ ತಿರುಗುವಿಕೆ, ಬಾಯಾರಿಕೆ ಇರುವವರು ವ್ಯಾಯಾಮ ಮಾಡಬಾರದು !
• ಊಟ ಮಾಡಿ ಮತ್ತು ಮೈಥುನ ಕರ್ಮದ ನಂತರ ವ್ಯಾಯಾಮ ಮಾಡಬಾರದು !

ಯಾವ ರೀತಿಯ ವ್ಯಾಯಾಮ ?

• ಓಡುವುದು, ನಿಂತಲ್ಲಿ ಓಡುವುದು, ನಡೆಯುವುದು ವಿವಿಧ ರೀತಿಯ ಸರ್ವಾಂಗಗಳಿಗೂ  ಶ್ರಮವೆನಿಸುವ ವ್ಯಾಯಾಮ ವ್ಯಾಯಾಮ ವಿಧಾನಗಳಲ್ಲಿ ಉತ್ತಮ.
• ಯೋಗಾಸನ, ಸೂರ್ಯನಮಸ್ಕಾರ, ಗುರು ನಮಸ್ಕಾರಗಳು ಅತ್ಯುತ್ತಮ.
• ವ್ಯಾಯಾಮದ ನಂತರ ಚೆನ್ನಾಗಿ ಮೈ ಹಿಸುಕಬೇಕು.
• ಕೇವಲ ಒಣ ವ್ಯಾಯಾಮ ಹಿತಕರವಲ್ಲ. ಮೈಗೆ ಎಣ್ಣೆ ಹಚ್ಚಿ  ವ್ಯಾಯಾಮ, ನಂತರ ಸ್ನಾನ ಅತ್ಯುತ್ತಮವಾದದ್ದು.
• ನೆನಪಿರಲಿ, ಮಧುಮೇಹ, ಆಮವಾತ, ಚರ್ಮರೋಗ ಮುಂತಾದ ಖಾಯಿಲೆಗಳು ಬರದಂತೆ ವ್ಯಾಯಾಮವೊಂದೇ ನಮ್ಮನ್ನು ರಕ್ಷಿಸಬಲ್ಲದು!